Gode nyhende om CO2-kompensasjon

Det er svært positivt at regjeringa ved dette forpliktar seg til at Norge vil implementera eit system for å kompensera for CO2-påslaget i kraftprisen. Det gjenstår framleis å sjå korleis EU sitt endelege regelverk til slutt blir.

Vi må tolka dette som eit tydeleg signal frå regjeringa om at norsk aluminiumsproduksjon er viktig og at Norge som nasjon ønskjer å halda fram med produksjon av aluminium med rein norsk vasskraft.

Rammeverket frå EU er i praksis ei maksramme for kompenasjon, og dei einskilde nasjonalstatane står i prinsippet fritt til å leggja seg på lågare satsar. Det er svært viktig for oss at regjeringa utnyttar handlingsrommet som systemet gir fullt ut.

Ved etablering av ei ny langsiktig kraftforsyning til SØRAL er dei to viktigaste parametra 1) synet på metallmarkedet (langsiktig) og 2) netto kraftpris (kraftpris – CO2-komp.). Det er krevande å få dette til å henge i hop, og ei halvvegs implementering av CO2-kompensasjon vil sjølvsagt ikkje gjera det enklare.

Oppsummeringa må bli at vi framleis ikkje er heilt i mål, men at vi ved det som no er signalisert har teke eit stort steg i riktig retning.

Helsing Per Øyvind Sævartveit

Adm.dir.